Laura Decurtins è creschida si a Cuira, ha absolvà studis preliminars a la Scola auta da musica a Lucerna (jazz e classica) ed ha studegià musicologia, istorgia e rumantsch a Turitg e Vienna. Suenter il master ha ella lavurà per la Concurrenza Svizra da Musica per la Giuventetgna (SJMW) ed ha alura promovì a l'Universitad da Turitg cun ina dissertaziun davart la musica e l'identitad musicala rumantscha. Sco collavuratura scientifica externa da l'Institut per la Perscrutaziun da la Cultura Grischuna (ikg) s'occupa ella en ses project actual cun las dunnas en la cultura musicala dal Grischun. Laura Decurtins chanta en divers chors/ensembles (t.a. Cantus Firmus Surselva, Origen Ensemble Vocal), publitgescha e referscha regularmain davart la musica rumantscha e s'engascha per projects culturals ed instituziuns (t.a. Fundaziun G.A. Derungs, La Chanzun Rumantscha, Tgea da tgànt, Opera Engiadina).
